Sunday, December 27, 2009

புத்தகங்கள் : பிரபல பதிவர்கள் பேட்டி - பகுதி 1 (300வது பதிவு)

சில புதிய நண்பர்கள் சில நேரங்களில் நான் எந்த புத்தகங்களில் இருந்து வாசிப்பைத் துவங்குவது? நீங்கள் ஏதாவது சிபாரிசு பண்ணுங்களேன் என்று கேட்பதுண்டு. இது ஆகக்கடினமான கேள்விகளில் ஒன்று. மனிதனின் அடிப்படைத் தேவைகள் தவிர்த்து வாழ்க்கையை முழுமையாக வாழ அடுத்த பிரதான தேவையாக இருப்பது கதைகள் என்று நான் நினைக்கிறேன். மொத்த தேவையையும் அனுபவம் மூலமாக மனிதனால் தெரிந்துகொண்டுவிட முடிவதில்லை. ஆகவே கதைகளின் மூலமாகவே அனுபவங்களைப் பெறவேண்டியதிருக்கிறது. அது மிக சுவாரசியமான ஒன்றாகவுமிருக்கிறது. உயிர்ப்பான கலைகள் பெரும்பாலும் கதைகளையே சொல்கின்றன. இருப்பினும் நமக்கு கதை சொல்ல வந்த புத்தகங்களே அந்தப்பணியைச் சிறப்பாகச் செய்யும் ஒரு அற்புத ஊடகம் என்பதை யாரும் மறுக்கமாட்டார்கள். அது இதுவென நோக்கமற்றுத் துவங்கும் வாசிப்பு ஒரு கட்டத்தில் நம்மை நமது ரசனை நோக்கி கொண்டு செல்கிறது. அதன் பின் விஷயங்களாகட்டும், வடிவங்களாகட்டும் நமக்குத் தேவையானதைத் தேடிப்பெறுகிறோம். அவ்வாறே ஒவ்வொருவரும் தனக்கான புத்தகங்களை தேடிச்செல்லவேண்டும் என நான் நினைக்கிறேன்.

இருப்பினும், சென்னை புத்தகத்திருவிழா கோலாகலமாக தொடங்கவிருக்கும் இவ்வேளையில் நண்பர்களிடம் புத்தகங்கள் குறித்து சில கேள்விகள் கேட்டிருந்தேன். அவர்களையும், அவர்கள் படிக்கும் புத்தகங்களையும் அறிந்துகொள்ளும் பொருட்டு அவர்கள் தந்த பதிலை அனுமதியுடன் இங்கே தருகிறேன். நண்பர்களுக்கு நன்றி.!

-அன்புடன் ஆதிமூலகிருஷ்ணன்.

****************************************

வெண்பூ (வெங்கட்)












1. ஒவ்வொரு காலகட்டங்களின் போதும் உங்கள் மனதோடு தங்கிவிட்ட சில புத்தகங்களை நினைவுகூர முடியமா? ?

சிறுவயதில் குமுதம், விகடனோடு என் வாசிப்பு முடிந்துவிட்டது. பதின்ம வயதுகளில் என் உறவினர் ஒருவரால் அறிமுகப்படுத்தப்பட்ட துப்பறியும் கதைகள்தான் (ராஜேஷ்குமார், சுபா & பிகேபி) என் உலகம். 2004ம் வருடம் ஹைதைக்கு சென்ற பிறகு, ஹாஸ்டலில் பொழுது போக்க ஆங்கில புத்தகங்களைப் படிக்க ஆரம்பித்தது என் வாசிப்பனுபவத்தில் ஒரு டர்னிங் பாய்ண்ட். தமிழில் துப்பறியும் கதைகளுக்கு வெளியே தீவிரமாகப் படிக்க ஆரம்பித்தது, பதிவுலகிற்கு வந்த பிறகே. அதற்காக பதிவுலகிற்கு ஒரு பெரிய நன்றி.

2. முன்பே இந்த புத்தகங்களை வாங்கவேண்டும் என திட்டமிடும் வழக்கமுள்ளவரா நீங்கள்? அப்படியாயின் இந்த புத்தகவிழாவின் போது என்ன புத்தகங்கள் வாங்க திட்டமிட்டுள்ளீர்கள்?

ஒரு சில புத்தகங்களையும் திரைப்படங்களையும் தேடி படிப்பதும் பார்ப்பதும் உண்டு. ஆனால் பெரும்பாலான சமயங்களில் கடைக்கு (அ) இணைய புத்தக விற்பனை தளங்களுக்கு சின்ன விசிட் அடிக்கச் சென்று அப்படியே வாங்குவதுதான் அதிகம். அதனாலேயே அந்த விசிட்களை தவிர்க்கின்ற அளவுக்கு அடிக்ட். இந்த விழாவில் கண்டிப்பாக வாங்கப்போகும் புத்தகங்கள்:

1. கல்கியின் பொன்னியின் செல்வன்

2. இரா.முருகவேள் மொழிபெயர்த்துள்ள விடியல் பதிப்பகத்தின் "ஒரு பொருளாதார அடியாளின் ஒப்புதல் வாக்குமூலம்"

3. ரஹோத்தமன் எழுதிய கிழக்கு வெளியீடான "ராஜிவ்காந்தி படுகொலை வழக்கு"

3. நீங்கள் சந்திக்க மிகவும் விரும்பிய எழுத்தாளர்கள் யாரும் உண்டா? உங்கள் ஆசை நிறைவேறிவிட்டதா? (அல்லது) யார் உங்கள் ஆதர்ச எழுத்தாளர்?

சிறு வயதுகளில் நான் படிக்கும் ஒவ்வொரு எழுத்தாளரையும் சந்திக்கவேண்டும் என்று நினைப்பதுண்டு.

ஆனால் எழுத்தாளர் தன் எழுத்துகளின் மூலம் கட்டமைக்கும் பிம்பத்திற்கும் உண்மைக்கும் தொலைவு பெரும்பாலும் அதிகம் என்பது புரிந்தபின் இப்போதெல்லாம் ஆசைப்படுவதில்லை.

ஆதர்ச எழுத்தாளர் என்று யாரும் இல்லை. சுவாரசியமாக எழுதும் அனைவரையும் பிடிக்கும், வலையுலக எழுத்தாளர்கள் உட்பட.

4. புத்தகங்கள் குறித்த உங்களால் மறக்கவியலாத சில நினைவுகள் / அனுபவங்கள் / எண்ணங்கள் ஏதேனும்.? (சில வரிகளில்)

சமீபத்தில் படித்த பொன்னியின் செல்வன். ஆயிரம் வருடங்களுக்கு முந்தைய வரலாற்றுடன் கற்பனையைக் கலந்து கொஞ்சமும் சுவாரசியம் குன்றாமல் 2500 பக்கங்களுக்கு ஒரு கதையை தமிழில் நான் கொஞ்சமும் எதிர்பார்க்கவில்லை என்பதே உண்மை.மற்றபடி மறக்கவியலாத நினைவு என்பது விகடன் இதழில் என் முதல் சிறுகதை வந்ததை சொல்லலாம்.

*******************************************

யுவகிருஷ்ணா (லக்கிலுக்)










1. ஒவ்வொரு காலகட்டங்களின் போதும் உங்கள் மனதோடு தங்கிவிட்ட சில புத்தகங்களை நினைவுகூர முடியமா?

‘மிட்டாய் பாப்பா,' ‘பாட்டனார் வீட்டில்' போன்ற வாண்டுமாமா ரக புத்தகங்கள் என் சிறுவயதில் வாசிக்க அப்பாவால் வற்புறுத்தப்பட்டு திணிக்கப்பட்டது. இருபது வருடங்கள் கழிந்தும் அப்புத்தகங்கள் என் நினைவடுக்குகளில் கல்வெட்டுகளாய் பதிந்துப் போயிருக்கின்றன. பின்னர் நானாக முயற்சித்து வாசித்த காமிக்ஸ் புத்தகங்கள். செவ்விந்தியர்களும், மாயாவிகளும் இன்னமும் என் கனவுகளை ஆக்கிரமித்துக் கொண்டிருக்கிறார்கள். வயசுக்கு வந்தபிறகு எல்லோரையும் போல குமுதமும், ஆனந்தவிகடனுமே துணை.

2001 அல்லது 2002 ஆக இருக்கலாம். ஒரு நண்பர் மூலமாக ‘எக்சிஸ்டென்ஷியலிஸமும், பேன்சி பனியனும்' கிடைத்தது. இலக்கிய வாசிப்பு மீது லேசான போதை ஏற்படுத்திய புத்தகம். அதைத் தொடர்ந்தே சாரு எழுதிய புத்தகங்கள் ஒவ்வொன்றாக தேடிப்பிடித்து வாசிக்கத் தொடங்கினேன். சாருவுக்கு முன்பாகவே ஜெயமோகனின் அறிமுகம் அப்பா மூலமாக கிடைத்தது. ரப்பரிலிருந்து அப்பா ஜெயமோகன் ரசிகர். ஆனாலும் சாரு லெவலுக்கு ஜெமோவால் என்னைக் கவர முடியவில்லை. சாரு புதுமைப்பித்தனை பிடிக்காது என்ற சொன்னபிறகே புதுமைப்பித்தனை வாசித்தேன். அவர் யாரையெல்லாம் பிடிக்காது என்று சொல்கிறாரோ அவர்களையும் தேடி வாசிப்பது கூடுதல் சுவாரஸ்யம்.

மனதோடு தங்கிவிட்ட நூல் என்று குறிப்பிட வேண்டுமானால் உயிர்மை ஆரம்ப காலத்தில் வெளியிட்ட ‘ஜெயமோகனின் குறுநாவல்களை' குறிப்பிடலாம். கிளிக்காலம், டார்த்தீனியம் என்று ஜெமோவின் மாஸ்டர் பீஸ் கதைகளை கொண்ட நூல் அது.

2. முன்பே இந்த புத்தகங்களை வாங்கவேண்டும் என திட்டமிடும் வழக்கமுள்ளவரா நீங்கள்? அப்படியாயின் இந்த புத்தகவிழாவின் போது என்ன புத்தகங்கள் வாங்க திட்டமிட்டுள்ளீர்கள்?

எந்தப் புத்தகத்தையுமே புரட்டிப் பார்த்து பிடித்திருந்தால் மட்டுமே வாங்குவது வழக்கம். முன்கூட்டிய திட்டமிடுதல் எதுவும் இதுவரை எந்த விஷயத்திலும் என்
வாழ்க்கையில் இருந்ததில்லை.

3. நீங்கள் சந்திக்க மிகவும் விரும்பிய எழுத்தாளர்கள் யாரும் உண்டா? உங்கள் ஆசை நிறைவேறிவிட்டதா? (அல்லது) யார் உங்கள் ஆதர்ச எழுத்தாளர்?

'சாரு'வை ஆதர்ச எழுத்தாளர் என்று சொல்லமாட்டேன். அவர் கடவுள். சந்திக்க விரும்பிய எழுத்தாளர்கள் ஒரு சிலரே. ராஜூமுருகன். அவரை ஓரிரு சந்தர்ப்பங்களில் சந்தித்துவிட்டேன். குமுதம் ஆசிரியர் பிரியா கல்யாணராமனை சந்திக்க வேண்டும் என்று ஆவல்.

4. புத்தகங்கள் குறித்த உங்களால் மறக்கவியலாத சில நினைவுகள் / அனுபவங்கள் / எண்ணங்கள் ஏதேனும்.? (சில வரிகளில்)

பாராவின் புத்தகங்கள் என் எழுத்தின் மீது வன்முறையாக ஆதிக்கம் செலுத்துகின்றன. நான்-பிக்ஸனுக்கு அவர் ஒரு ட்ரெண்ட் செட்டர் என்று சொல்வேன். சிக்கலான அரசியல் விவகாரங்களை எளிமையான எழுத்துகளில் வெளிபடுத்தும் அவரது பாணி அடுத்த தலைமுறை வரை தாக்கத்தை ஏற்படுத்தவல்லது. அவர் எழுதிய ‘என் பெயர் எஸ்கோபர்' என்ற நூலின் பயன்படுத்திய எழுத்து தொழில்நுட்பத்தையே நான் அப்பட்டமாக காப்பி அடித்து வருகிறேன். - இது எண்ணங்கள் கேட்டகிரியில் வரும்.

நினைவுகள்/அனுபவங்கள் எதுவும் நினைவுக்கு வந்து தொலையமாட்டேன் என்று அடம்பிடிக்கிறது :-(

********************************************

பரிசல்காரன் (கே.பி.கிருஷ்ணகுமார்)











1. ஒவ்வொரு காலகட்டங்களின் போதும் உங்கள் மனதோடு தங்கிவிட்ட சில புத்தகங்களை நினைவுகூர முடியமா?

பலமுறை பல இடங்களில் இதுபற்றிச் சொல்லியிருக்கிறேன். சென்றமுறை அமெரிக்கத் தமிழ்ச்சங்கம் நடத்திய விழாவில் பேசும்போது கூட.... (ஐயையோ, அடிக்க வராதீங்க)

கல்யாண்ஜியின் ‘எல்லோர்க்கும் அன்புடன்’ மற்றும் கவிதைகள்

ஆதவனின் என் பெயர் ராமசேஷன்

இன்னொரு புத்தகம்: லிஃப்கோவின் ஆங்கில-தமிழ் அகராதி

2. முன்பே இந்த புத்தகங்களை வாங்கவேண்டும் என திட்டமிடும் வழக்கமுள்ளவரா நீங்கள்? அப்படியாயின் இந்த புத்தகவிழாவின் போது என்ன புத்தகங்கள் வாங்க திட்டமிட்டுள்ளீர்கள்?

வருடா வருடம் நடக்கும்போதும் போக ஆசை. டிசம்பர்தான் எனக்கு இங்கே பிஸியென்பதால் வரமுடிவதில்லை.

அப்படி வருவதாயின் உயிர்மையின் புதிய புத்தகங்களை அலசி வாங்க ஆசை. அப்புறம் நம் பதிவுலக நண்பர்களின் புத்தகங்களை, புத்தக ஸ்டால்களில் பார்க்க (வாங்கவும்தான்) ஆசை. அந்தப் பரவசமே தனி. இதை பாலபாரதியின் புத்தகம் வந்தபோது ஈரோடு திருவிழாவிலும், லக்கியின் புத்தகம் வந்தபோது திருப்பூரிலும் உணர்ந்திருக்கிறேன். இப்போது நர்சிம்.

அப்புறம் நகுலன் கவிதைகள் முழுத்தொகுப்பு.

3. நீங்கள் சந்திக்க மிகவும் விரும்பிய எழுத்தாளர்கள் யாரும் உண்டா? உங்கள் ஆசை நிறைவேறிவிட்டதா? (அல்லது) யார் உங்கள் ஆதர்ச எழுத்தாளர்?

எழுதும் எல்லாரிடமும் ஏதாவதொன்றைக் கற்றுக் கொண்டே வருகிறேன். சந்திக்க விரும்பிய எழுத்தாளரென்று ஒருவர் இருந்தார். சந்திக்கவில்லை. இனியும் சந்திக்க இயலாது. :-( அவர்தான் என் ஆதர்ச எழுத்தாளர். அவரை ஆதர்ச எழுத்தாளராய் ஏற்றுக் கொள்ள அவரது எழுத்து மட்டுமின்றி அவர் குடும்பம், எழுத்து, தன் பணி என எல்லாவற்றையும் வெகு நேர்த்தியாய்க் கையாண்டதும் ஒரு காரணம்.

4. புத்தகங்கள் குறித்த உங்களால் மறக்கவியலாத சில நினைவுகள் / அனுபவங்கள் / எண்ணங்கள் ஏதேனும்.? (சில வரிகளில்)

புத்தகங்கள் மீதான காதல் தீராக்காதலாகவே இருக்கிறது. சில புத்தகங்களை வாங்க நெடுநாளாகிறது. எளிதில் கிடைப்பதில்லை. அப்படி ஒரு புத்தகம் ’கோட்ஸ்டாண்ட் கவிதைகள்’ உட்பட நகுலனின் கவிதைகள் அடங்கிய முழுத்தொகுப்பு. இரண்டு வருடங்களாக பல நண்பர்களிடம் கேட்டுக் கொண்டே இருக்கிறேன். சென்னை சென்றிருந்தபோது ஒரு நண்பரை இந்தப் புத்தகம் தேடியலைய அழைத்தபோது ‘அடுத்த வாரம் வந்து சேரும்’ என்று ரயிலேற்றினார். ம்ஹூம். சென்ற வாரம் ஈரோடு வந்திருந்த நண்பரும் பதிப்பாளருமான அகநாழிகை வாசுதேவன் வாங்கி அனுப்புவதாய் என் தலைமேலடித்து சத்தியம் செய்துவிட்டுப் போயிருக்கிறார். பார்ப்போம்.

*****************************************************

நிலாரசிகன்













1. ஒவ்வொரு காலகட்டங்களின் போதும் உங்கள் மனதோடு தங்கிவிட்ட சில புத்தகங்களை நினைவுகூர முடியமா?

பால்ய வயதில்:

முதன் முதலில் நான் வாசித்த கதைப்புத்தகம் "சிறுவர்மலர்". எங்கள் வீட்டில் அப்போது செய்தித்தாள் வாங்குவதில்லை. பக்கத்துவீட்டிற்கு வரும் சிறுவர்மலரை படிக்க எனக்கும் என் அண்ணனுக்கும் பெரிய போட்டியே நடக்கும்.வெள்ளிக்கிழமை என்றாலே சிறுவர்மலரும் "ஒலியும் ஒளியும்" தான் அப்போதைய பேரானந்தங்கள்.

பதின்ம வயதில்:

இரும்புக்கை மாயாவியும், அப்போதைய சோவியத் யூனியனிலிருந்து எங்கள்வீட்டிற்கு வந்த ஒரு ருஷிய காமிக்ஸும். பெயர் நினைவில் இல்லை.

கல்லூரிக்காலங்களில்:

தீவிர இலக்கிய வாசிப்பு அறிமுகமானது கல்லூரியில்தான். ஜெயகாந்தன்,கல்கி,புதுமைப்பித்
தன்,அசோகமித்திரன்,செக்காவ்,அப்துல் ரகுமான்,நா.காமராசன்,கலாப்ரியா,கல்யாண்ஜி,ச.தமிழ்செல்வன்,சுஜாதா..... மிகப்பெர்ர்ர்ர்ரிய பட்டியல். இதில் மனதில் தங்கிய புத்தகமாக பொன்னியின் செல்வன்,கலீல் ஜிப்ரானின் முறிந்த சிறகுகள்,கல்யாண்ஜியின் நிலாபார்த்தல்,

பணிபுரியும் தற்காலத்தில்:

வெகு நாட்களாக வாசிக்க நினைத்து முடியாமல் போன வண்ணநிலவனின் "கடல்புரத்தில்" நாவலும்,கி.ரா வின் "பிஞ்சுகள்" நாவலும் மனதை கவர்ந்த படைப்புகள். மனதில் தங்கிய படைப்பாக கண்மணி குணசேகரனின் "அஞ்சலை"யும் யுவன் சந்திரசேகரனின் "ஒளி விலகலும்"

2. முன்பே இந்த புத்தகங்களை வாங்கவேண்டும் என திட்டமிடும் வழக்கமுள்ளவரா நீங்கள்? அப்படியாயின் இந்த புத்தகவிழாவின் போது என்ன புத்தகங்கள் வாங்க திட்டமிட்டுள்ளீர்கள்?

ஆம். இந்த புத்தக கண்காட்சியில் கீழ்கண்ட நூல்களை வாங்க திட்டமிட்டிருக்கிறேன்.

உயிர்மை பதிப்பகம்:

1. நகரத்திற்கு வெளியே - சிறுகதைகள் - விஜய் மகேந்திரன்
2.நீலநதி - சிறுகதைகள் - லஷ்மி சரவணக்குமார்
3.புதியகாலம் - கட்டுரைகள் - ஜெயமோகன்
4.வாசக பர்வம் - கட்டுரைகள் - எஸ்.ராமகிருஷ்ணன்
5.நகுலன் வீட்டில் யாருமில்லை - சிறுகதைகள் - எஸ்.ராமகிருஷ்ணன்
6.கெட்ட வார்த்தை - கட்டுரைகள் - சாரு நிவேதிதா
7.வேட்கையின் நிறம் - கவிதைகள் - உமா சக்தி
8.மஞ்சணத்தி - கவிதைகள் - தமிழச்சி தங்கபாண்டியன்
9.சைபர் சாத்தான்கள் - கட்டுரைகள் - வா.மணிகண்டன்
10.சாந்தாமணியும் இன்னபிற காதல் கதைகளும் - நாவல் - வா.மு.கோமு
11.கானல் வரி - குறுநாவல் - தமிழ்நதி
12.அதீதத்தின் ருசி - கவிதைகள் - மனுஷ்ய புத்திரன்
13.ஒரு ரகசிய விருந்திற்கான அழைப்பு - மொழிபெயர்ப்பு கவிதைகள் - யமுனா ராஜேந்திரன்
14.நீர்ப்பறவைகளின் தியானம் - சிறுகதைகள் - யுவன் சந்திரசேகர்

வம்சி பதிப்பகம்:

15.கிளிஞ்சல்கள் பறக்கின்றன - கவிதைகள் - வலைப்பதிவர்களின் கவிதைகள் அடங்கிய தொகுப்புநூல்
16.மரப்பாச்சியின் சில ஆடைகள் - சிறுகதைகள் - வலைப்பதிவர்களின் சிறுகதைகள் அடங்கிய தொகுப்புநூல்
17.தனிமையின் இசை - அய்யனார்

காலச்சுவடு பதிப்பகம்:

சில புத்தகங்கள்

3. நீங்கள் சந்திக்க மிகவும் விரும்பிய எழுத்தாளர்கள் யாரும் உண்டா? உங்கள் ஆசை நிறைவேறிவிட்டதா? (அல்லது) யார் உங்கள் ஆதர்ச எழுத்தாளர்?

மிகவும் விரும்பியவர் ஜெயகாந்தன். கடந்தவருடன் இருமுறை அவரை சந்தித்து பேசும் வாய்ப்பு கிடைத்தது. கடைசிவரை நேரில் சந்திக்க இயலாமல் போனவர் சுஜாதா.

ஆதர்ச எழுத்தாளர் தமிழில் எஸ்.ரா, வண்ணதாசன் ஆங்கிலத்தில் ஓ.ஹென்றி. (இவை தற்காலிகமானது. வாசிப்பனுபவத்தை பொறுத்து மாறிக்கொண்டே இருக்கும் )

4. புத்தகங்கள் குறித்த உங்களால் மறக்கவியலாத சில நினைவுகள் / அனுபவங்கள் / எண்ணங்கள் ஏதேனும்.? (சில வரிகளில்)

என் முதல் கவிதை நூல் வெளியான கல்லூரிப்பருவத்தில் அதை விற்பதற்காக பட்ட பாடுகள். சமீபத்தில் வெளியான என் சிறுகதை நூலை பெற வந்திருந்த ஒரு அறிமுகமில்லாத பெரியவரின் நெகிழ்வான பாராட்டு...இப்படி வலியும் புன்னகையும் கலந்த வாழ்க்கைபோலவே புத்தகங்கள் குறித்தான அனுபவங்களும் தொடர்கின்றன.

54 comments:

கனவுகள் விற்பவன் said...

300க்கு வாழ்த்துக்கள்...

அ.மு.செய்யது said...

300 ஆவது "அதிரடி" பதிவுக்கு வாழ்த்துக்கள் !!!

வாசகர்,பதிவர்,எழுத்தாளனின் பரந்து பட்ட பார்வையை
பரிமாறியதற்கு உங்களுக்கொரு சபாஷ் !!!

நல்ல முயற்சி !!

jothi said...

300 ஆவது பதிவுக்கு வாழ்த்துக்கள்,..

ஹாலிவுட் பாலா said...

நான் அப்பவே சொன்னேங்க ஆதி. நான் இன்னும் பிரபலம் ஆகலைன்னு. பசங்க கேட்டாதானே! :) :) :)

--

ட்ரிபிள் சென்சுரிக்கு வாழ்த்துகள்! :)

வானம்பாடிகள் said...

300க்கு வாழ்த்துகள். பேட்டி அருமை.

பிரியமுடன்...வசந்த் said...

300,,,, க்கு வாழ்த்துக்கள்

பரிசலாரின் பேட்டியும் லக்கியின் பேட்டியும் ரசித்து படித்தேன்...!

பிரபாகர் said...

முந்நூறு இடுகைகளை
முத்தாய்ப்பாய் அளித்திட்ட
என்னினிய நண்பா நீர்
இன்னும் பல எழுதிட்டு

ஐநூறு ஆயிரமாய்
அழகாய் அளித்திடவே
எந்தை வேலை வணங்கி
இதயமாற வாழ்த்துகிறேன்.

பிரபாகர்.

சின்ன அம்மிணி said...

பேட்டி அருமை.

300க்கு வாழ்த்துக்கள்.

cheena (சீனா) said...

அன்பின் ஆதி

முத்தான முன்னூறுக்கு நல்வாழ்த்துகள் பாராட்டுகள்

பதிவர்களின் பேட்டி அற்புதம் - தொகுத்தமையும் நன்று

நல்வாழ்த்துகள் ஆதி

பிரசன்னா said...

பேட்டி வடிவில் நல்ல சுவாரசியமாக தந்து இருக்கிறீர்கள்.. நன்றி!



//கடைசிவரை நேரில் சந்திக்க இயலாமல் போனவர் சுஜாதா//

இன்னும் கொஞ்ச நாள் இருந்து இருந்தால் தான் என்னவாம் :(

நாடோடி said...

300க்கு வாழ்த்துக்கள்..தொடந்து கலக்குங்க ஆதியண்ணே...

கார்க்கி said...

300க்கு வாழ்த்துகள்

புருனோ Bruno said...

//(ராஜேஷ்குமார், சுபா & பிகேபி//

நீங்களும் நம்ம கட்சியா :) :)

Cable Sankar said...

300kku வாழ்த்துக்கள்.

வெண்பூ said...

300 ஆஆஆஆஆஆஆஆஆஆ.... 300 முறை கைகுலுக்குகிறேன் ஆதி.. பாராட்டுகள்..

பிரபலங்களின் (ஹி..ஹி..) பேட்டி நல்லாவே வந்திருக்கு.. :)))

க‌ரிச‌ல்கார‌ன் said...

300 க்கு வாழ்த்துக்க‌ள்

ஜெட்லி said...

300க்கு வாழ்த்துகள் அண்ணே....

ராஜகோபால் (எறும்பு) said...

300 ஆவது பதிவுக்கு வாழ்த்துக்கள்.
அப்படியே இந்த கேள்விக்கு உங்க பதிலையும் போடுங்க....
வாசகர் விருப்பம்...

எம்.எம்.அப்துல்லா said...

300 kku vaalthugal :)

Sangkavi said...

300 வது இடுக்கைக்கு எனது வாழ்த்துக்கள்........

துளசி கோபால் said...

அருமையான தொகுப்பு.

மனிதர்களைப் படிப்பது வெகு சுவாரசியமானதே!!!!

முன்னூறாமே???? இனிய பாராட்டுகள்.

வித்யா said...

300க்கு வாழ்த்துகள். பேட்டிகள் நன்றாக இருந்தன.

நர்சிம் said...

300க்கு வாழ்த்துகள்.

வெண்பூ... பெரிய சிறுபத்திரிகை ஆசிரியர் ரேஞ்சுக்கு பேட்டி கொடுத்திருக்கீங்களே.. மேலுக்கு சுகமில்லையா தலைவா? வார்த்தைகள் எல்லாம் படு பயங்ங்ங்ங்கரமாவுல்ல இருக்கு..ஆத்தீ..

நர்சிம் said...

//பதின்ம வயதுகளில்//

//தன் எழுத்துகளின் மூலம் கட்டமைக்கும் பிம்பத்திற்கும் உண்மைக்கும் தொலைவு பெரும்பாலும் அதிகம் என்பது புரிந்தபின் இப்போதெல்லாம்//

டிக்கி டிக்கி டியாண்டோய்ய்..வெண்பூ

துபாய் ராஜா said...

300-வது பதிவிற்கு வாழ்த்துக்கள் ஆதி.

ஆதிமூலகிருஷ்ணன் said...

300க்கு வாழ்த்திய அத்தனை நல்லுள்ளங்களுக்கும் மனமார்ந்த நன்றி.!

நன்றி கனவுகள் விற்பவன். (நல்லா யாவாரம் ஆவுதா?)

நன்றி செய்யது.
நன்றி ஜோதி.
நன்றி பாலா.
நன்றி வானம்பாடி.
நன்றி வசந்த்.

நன்றி பிரபாகர். (அதுக்கு பேஏர் என்னது? கவுஜையா? :-)

நன்றி அம்மிணி.
நன்றி சீனா.

நன்றி பிரசன்னா. (இவர்கள் மட்டுமல்லாது இனிவரும் பகுதிகளிலும் சுஜாதாவே அதிகமாக நினைவுகூறப்பட்டுள்ளார்.

நினைச்சாலே ஆத்திரமாக வருகிறது. இன்னும் கொஞ்சநாள் இருந்து தொலைத்திருந்தால்தான் என்ன.?)

நன்றி நாடோடி.
நன்றி கார்க்கி.
நன்றி புரூனோ.
நன்றி கேபிள்.
நன்றி வெண்பூ.
நன்றி கரிசல்.
நன்றி ஜெட்லி.
நன்றி எறும்பு.
நன்றி அப்துல்லா.
நன்றி சங்கவி.

நன்றி துளசி மேடம். (என்ன ஆமே.? நம்புங்க ஆம்தான்.! :-)

நன்றி வித்யா.

நன்றி நர்சிம். (:-))

நன்றி துபாய்ராஜா.

தமிழ்மணத்துல 3 ஓட்டு விழுந்திருக்குது. அப்படியே இன்னும் ஒண்ணு யாராவது போட்டீங்கன்னா பரிந்துரையில வந்துடும். பண்ணிவிடுங்க, என்ன பண்றது?

ப்ரியமுடன் பாலா said...

வாழ்த்துக்கள் ஆதி!!!
பரிசலின் ஆதர்ச எழுத்தாளரும் சுஜாதா என்றுதான் நினைக்கிறேன் - தனது வலது மற்றும் இடது மூளையை (Creative and analytical side of brain) சமமாக பயன்படுத்தியவர்.

-- ப்ரியமுடன் பாலா

நிலாரசிகன் said...

இப்போதுதான் இந்த பதிவை பார்த்தேன் ஆதி. 300க்கு வாழ்த்துகள்.நன்றியும் :)

பகுதி 2க்காக காத்திருக்கிறேன்.

சென்ஷி said...

300க்கெல்லாம் வாழ்த்து சொல்லப் போவது இல்லை. இன்னும் நீங்க அடிச்சு ஆடுங்க..

சிறப்பான தொகுப்பு.. நன்றி ஆதி

பாபு said...

300க்கு வாழ்த்துகள்

KVR said...

நிலா ரசிகனின் பதில்கள் உபயோகமானது. லக்கியின் பதில்கள் சுவாரசியம். மற்றவை!!!

பிரபல பதிவர்கள் எல்லோருமே நல்ல வாசிப்பனுபவமும் கொண்டிக்கணும்ன்னு எதாவது கட்டாயமா என்ன ;-)?

KVR said...

300க்கு வாழ்த்துகள்

KVR said...

//அப்படி ஒரு புத்தகம் ’கோட்ஸ்டாண்ட் கவிதைகள்’ உட்பட நகுலனின் கவிதைகள் அடங்கிய முழுத்தொகுப்பு.//

பரிசல், கடந்த ஆகஸ்ட் வரையில் நகுலனின் கவிதைகள் முழுத் தொகுப்பாக வெளிவரவில்லை என்றே நினைக்கிறேன். அதற்கு பின்னர் வந்திருந்தால் உங்கள் நண்பர் வாங்கித் தர வாய்ப்புண்டு. நகுலனின் பெரும்பாலான புத்தகங்கள் நியு புக்ஸ்லேண்டிலேயே கிடைக்கிறது.

தமிழ் வெங்கட் said...

நிறைய நல்ல நண்பர்களை பெற்றுள்ளீர்கள் இமாலய 300க்கு வாழ்த்துகள் ராகுல சங்கிருத்தியான்
எழுதிய “சிந்து முதல் கங்கை வரை”
அருமையான புத்தகம்.

குசும்பன் said...

முதல் படத்தில் இருக்கும் ஈரோ ஆரு?
மலையாள பர ஈரோ(ஹீ இல்ல) மாதிரியே இருக்காரு:)))

குசும்பன் said...

3000க்கு அட்வான்ஸ் வாழ்த்துக்கள்!

ஆதிமூலகிருஷ்ணன் said...

நன்றி பாலா.
நன்றி நிலா.
நன்றி சென்ஷி.
நன்றி பாபு.
நன்றி கேவிஆர்.
நன்றி வெங்கட்.
நன்றி குசும்பன்.

அன்பு நண்பர்களே.. இந்தத்தொகுப்பு இன்னும் 3 (அதாவது மொத்தம் 4) இன்றும் நாளையும் வெளியாகலாம். தொடர்ந்து ஆதரவு தரவும். பின்னூட்டமிடும் நண்பர்கள் அவர்களால் மறக்க இயலாத புத்தகங்களை பகிர்ந்துகொண்டால் அவற்றை இறுதிப்பாகத்தில் தனியாக நோட் செய்யலாம் என்றிருக்கிறேன். புதிதாக வாசிக்கத்துவங்கியவர்களுக்கு உதவியாக இருக்கலாம். நன்றி.

ஆதிமூலகிருஷ்ணன் said...

அவ்வ்வ்வ்.. நானும் Proble பதிவராகிவிட்டேனா? இந்தப்பதிவுக்குப்போய் ஒரு மைனஸ் ஓட்டு விழுந்திருக்குது.? :-((

ராமலக்ஷ்மி said...

முன்னூறு விரைவில் ஆயிரம் தொட என் அன்பான வாழ்த்துக்கள்!

ஜெயந்தி said...

300வது பாலோயராக சேர வேண்டும் என்று காத்திருந்தேன். கரெக்டாக கோவை சென்றபோது 300 காலி (வட போச்சே) சரியாக அப்செட் ஆகிவிட்டேன். பராவாயில்லை இந்த 300ரிலாவது கலந்துகொள்கிறேன். வாழ்த்துக்கள்!

அன்புடன் அருணா said...

300க்கும் அதிரடி பேட்டிக்கும் பூங்கொத்து!

குசும்பன் said...

//ஆதிமூலகிருஷ்ணன் அவ்வ்வ்வ்.. நானும் Proble பதிவராகிவிட்டேனா? இந்தப்பதிவுக்குப்போய் ஒரு மைனஸ் ஓட்டு விழுந்திருக்குது.? :-((
//

யோவ் யாருய்யா உங்களுக்கு எல்லாம் இதை சொல்லிக்கொடுத்தது, கீழே இருக்கிறவன் மேலே வரனும் என்றால் உன்னை கீழே இழுத்துதானே ஆகனும்...அப்படி ஒருசிலர் இருக்கிறார்கள். உன்னை போட்டுவிட்டு மேலே வருவார்கள்!


சும்மா பச்சபுள்ள மாதிரி இருந்துக்கிட்டு நாமும் பிராபள பதிவர் ஆயிட்டோம் என் கனவில் மிதக்காதீர்...அதுக்கு எல்லாம் முகத்தில் நாலு தழும்பு, நெஞ்சில் ரெண்டு கத்தி குத்து எல்லாம் இருக்கனும் ஓக்கேவா.

ஆதிமூலகிருஷ்ணன் said...

ராமலக்ஷ்மி,
அருணா,
ஜெயந்தி (எவ்ளோ நாளா கோவையில் இருந்தீங்க?? விளையாடுறீங்களா? 300 வர்றதுக்கு நான் என்னா கஷ்டப்பட்டேன் தெரியுமா? கோழி அடைகாப்பது போல ரிப்ரெஷ் பண்ணி பாத்துக்கிட்டேயிருந்தேன் :-()

அனைவருக்கும் நன்றி.

அப்புறம் ஒரு சேதி.. ரெண்டாவது பாகத்தையும் போட்டாச்சு.!

ஆதிமூலகிருஷ்ணன் said...

அதானே பாத்தேன். ரவுடின்னா ஒத்துக்க மாட்டீங்களே.! (ROTFL Kusumban.!)

Romeoboy said...

நிலா ரசிகன் சொல்லி இருக்கும் புத்தகங்களின் தலைப்பே ரொம்ப சுவரசியம்மா இருக்கிறது . எப்படியும் இந்த தடவை 10 புத்தகங்கள் வாங்க வேண்டும் என்று இருக்கிறேன்.
எனது லிஸ்ட் இதுதான்
1. ஏழாம் உலகம் - ஜெயமோகன்
2. காமருப கதைகள், கெட்ட வார்த்தைகள் - சாரு
3. யாமம் - ராமகிருஷ்ணன்
4. கிழக்கு பதிப்பகத்தின் இருந்து 4 புத்தகங்கள்.
5. பூக்களிலிருந்து புத்தகங்கள்

வால்பையன் said...

சிறப்பான பணி!

செல்வேந்திரன் said...

பலமுறை பல இடங்களில் இதுபற்றிச் சொல்லியிருக்கிறேன். சென்றமுறை அமெரிக்கத் தமிழ்ச்சங்கம் நடத்திய விழாவில் பேசும்போது கூட..// excellent parisal..

செல்வேந்திரன் said...

Anna Good work...! impressive...!

பரிசல்காரன் said...

300க்கு வாழ்த்துகள் ஆதி.

வித்தியாசமான பதிவு. அதுவும் புத்தகத் திருவிழாவின்போது இத்தகைய பதிவு வருவது டாபிகல்.

அடிச்சு ஆடறீங்க!

பரிசல்காரன் said...

நானே ஐம்பதாவது கமெண்டையும் போட்டுடறேன்..

@ கேவிஆர்

சென்றவருடன் சென்னை சென்றபோது முழுத்தொகுப்பு வந்திருப்பதாய் ஜ்யோவ்ராம் சுந்தர் சொன்னார். அதனால்தான் தேடிக் கொண்டிருக்கிறேன்.

அமிர்தவர்ஷினி அம்மா said...

அ.மு.செய்யது said...
December 28, 2009 1:03 AM 300 ஆவது "அதிரடி" பதிவுக்கு வாழ்த்துக்கள் !!!

வாசகர்,பதிவர்,எழுத்தாளனின் பரந்து பட்ட பார்வையை
பரிமாறியதற்கு உங்களுக்கொரு சபாஷ் !!!

நல்ல முயற்சி !! //

வழிமொழிகிறேன்.
வித்தியாசமான மற்றும் உபயோகமான பதிவும் கூட.

ஆதிமூலகிருஷ்ணன் said...

நன்றி ரோமியோ.!
நன்றி வால்பையன்.!
நன்றி செல்வேந்திரன்.!

நன்றி பரிசல்.! (மீ த 50ஐ நைஸா போடுறீங்களா? பாரா கிட்ட சொல்லிக்குடுக்கிறேன் இருங்க)

நன்றி அமித்துஅம்மா.!

Karthik said...

ஒரு சீரீஸ்ல நாலு பாகங்களை ஒரே நாள்ல நான் படிச்சதே இல்ல. இதான் முதல் முறை. மொத்தமா படிக்கும்போது பெரும்பாலானவர்கள் பதில்கள்ல இருக்கற சிமிலாரிட்டீஸ் தெரியுது. ஒரு தலைமுறையையே பாதிக்கற அளவு எழுதிருக்கற எழுத்தாளர்கள்... பெரிய விஷயம்.

நல்ல தொகுப்புங்ணா. நான் என்ன புக் வாங்கறதுன்னு இப்போ குழப்பாமாகிடுச்சு.

நல்லதந்தி said...

//'சாரு'வை ஆதர்ச எழுத்தாளர் என்று சொல்லமாட்டேன். அவர் கடவுள்.//
கடவுளை செருப்பால் அடித்த பகுத்தறிவுச் சிங்கம் பெரியார் ஞாபகம் ஏனோ இப்போது வந்துத் தொலைக்கிறது!!! :)

அவர் அடித்தது கடவுளை அல்ல! கடவுள் சிலையை என்று பகுத்தறிவு சோதரர்கள் கருத்து சொல்லி அவமானம் தேடிக்கொள்ள வேண்டாம்!