Saturday, October 8, 2011

பார்த்தேன் : முரண், சதுரங்கம், ராரா



முரண் :

ஆங்காங்கே சில ரசனையான காட்சிகள். காதலியைப் பறிகொடுத்துவிட்டு அப்பாவின் மேல் கொலைவெறியில் இருக்கும் பணக்கார இளைஞன், மனைவி டார்ச்சரில் பரிதாப நிலையில் இருக்கும் ஒரு ஜீவன்.. இரண்டு பேரும் ஒரு கார் லிஃப்ட் காரணமாக சந்திக்க நேரிடுகிறது. சுவாரசிய முடிச்சாக இருவர் பிரச்சினையையும் இருவரும் இடம் மாறி கொலைகள் செய்து தீர்த்துக்கொள்ளலாம் என்று ஐடியா சொல்கிறார் பிரசன்னா. சேரன் அதை ஏற்றாரா? அதன் பின் என்ன நடந்தது என்பது கதை. பிரசன்னா காரெக்டரோட ட்விஸ்ட் சுவாரசியம். பார்த்தாலே கடுப்படிக்கிற நடிப்பிற்குச் சொந்தக்காரரான சேரன், என்னவோ இந்தப்படத்தில்தான் ஓரளவு பொருத்தமான காரெக்டர் பண்ணியிருப்பதாக எனக்குப் பட்டது. வித்தியாசமான, இதுவரை தமிழில் சொல்லப்படாத கதைக்களம் என்றால் அதற்காகவே எத்தனை குறைகள் இருந்தாலும் பொறுத்துக்கொள்ளலாம் என நினைக்கிறேன். 



இதுவும் அப்படியான ஒரு கதைதான். சுட்டது.. ஃப்ரம் ஆங்கிலம் டூ தெலுங்கு டூ தமிழ்னு கேள்விப்பட்டேன். கொஞ்சம் படம் நல்லாயிருந்தாலே சுட்டதுன்னு டிஃபால்டா நாமளே முடிவு பண்ணிக்கவேண்டியதுதான். பின்ன என்னிக்கு நம்மாளுங்க சொந்தமா ஒரு நல்ல விஷயத்தைப் பன்ணியிருக்காங்க.. பதிவுலகம் வந்த பிறகுதான் கொஞ்சம் அறிவாளிகள், வெளிப்படங்கள் பார்க்கிறவங்க சொல்லித்தான் கமல்ஹாஸன், மணிரத்னம் முதற்கொண்டு நாம் மதிக்கும் ஆட்கள் முதலாக, இன்னிக்கு வந்த மொக்கை பார்ட்டிகள் உட்பட சுட்டே தமிழ் படவுலகை வளர்க்கிறாங்கன்னு தெரிகிறது நமக்கு. எது வரைக்கும் அது ஓகே.? காப்பின்னா என்னா? போலின்னா என்னா? இன்ஸ்பிரேஷன்னா என்னா? எது வரைக்கும் இதை நாம் கலைன்னு ஏத்துக்க முடியும்? படைப்புக்கும், திருட்டுக்கும் இடைப்பட்ட நூலிழை கேப்பு என்னாங்கிறதையெல்லாம் ஆராய்ஞ்சு ஒரு முடிவுக்கு அப்பாலிக்கா வருவோம்.

இப்போதைக்கு இந்தப் படத்தைப் பார்க்கலாம்னு தீர்ப்பு வழங்குறேன்.

***********

சதுரங்கம் :

ரொம்ம்ம்ம்ப லேட்டாகி வெளியாகிற படங்களோடு நாம் அவ்வளவு எளிதில் ஸிங்க் ஆகமுடிவதும் இல்லை. ஏதாவது சைக்கலாஜிகல் பிராப்ளமாக இருக்கலாம். 5 ரூபாய்க்கு வழியில்லாததால் பஸ்ஸில் டிக்கெட் எடுக்காமல், ஃபைன் கட்டமுடியாமல் சிறைக்குப் போவதாக ஸ்ரீகாந்த் அறிமுகமாகி அதிரடி ட்விஸ்டாக அவர் பத்திரிகை நிருபர் என்று தெரிகையில் அடாடா தவறிப்போய் ஒரு நல்ல படத்துக்கு வந்துட்டோம் போலயே என்று நினைத்து நிமிர்ந்து உட்கார்கிறோம். அப்புறம் அப்படியெல்லாம் அவசரப்பட்டு முடிவுக்கு வந்துவிடவேண்டாம் என்று மொக்கை காதல் காட்சிகளும், ஆக்‌ஷன்களும் வந்து இதுவும் ஒரு லவ், கடத்தல், அதனால் ஆக்‌ஷன் என்ற டிபிகல் படம்தான் என்று டைரக்டர் இடைவேளை வரும் முன்பே சொல்லிவிடுகிறார். 



காதலி கடற்கரையில் வைத்து காதலனைப் பார்த்து பரிதாபமாய் ‘உன் அப்பா நம் திருமணத்துக்கு சம்மதிக்காமல் போகட்டும்’ என்று சொல்லி, அதற்கான காரணமாய் மனதைத் தொடும் ஒரு உணர்வைச் சொல்வது, வில்லன் இவரை சுற்றவிட்டு அதற்கான காரணமாய் ஹீரோவின் தொழிலை நக்கல் விடும் இடம், இன்னொரு வில்லன் ஹீரோவுக்கு நம்பிக்கையூட்டுவது (அதற்காக படம் முடியும்வரை மீண்டும் மீண்டும் வந்து நம்பிக்கையூட்டிக்கொண்டேயிருப்பது கொஞ்சம் ஓவர்) போல இதிலும் சுவாரசியமான காட்சிகள் உண்டு.

நேரம் போகாமல் வீட்ல உட்கார்ந்திருப்பவர்கள், பீரியட் பிலிம் பார்க்க ஆசைப்படுபவர்கள் இதற்குப்போகலாம். ஹிஹி.. சோனியா அகர்வால். உட்லாண்ட்ஸ் ட்ரைவ் இன், நோக்கியா 1100 என ஒரு பீரியட் ஃபிலிம் பார்த்தமாதிரி ஒரு ஃபீலிங்கி. 

************

ரா ரா :

கோடி ரூபாய் கொடுத்தாலும் பார்க்கவே கூடாது என்று நான் சில படங்களை நினைப்பதுண்டு. சிறந்த படமோ, மொக்கைப் படமோ அதற்கென்று ஒரு உழைப்பும், செலவும் இருக்கிறது. அப்படி எடுக்கப்படும் படங்களுக்கு பொறுப்பில்லாமல் ஏனோ தானோ என்று இவர்கள் வைக்கும் டைட்டிலைப் பார்த்து நேரில் போய் மொத்தலாமா என்று வரும். இதுவும் அப்படியான ஒரு டைட்டில்தான். ஆனால் கோடி ரூபாய் கொடுக்காவிட்டாலும் டிக்கெட்டை மட்டும் நண்பர் ஒருவர் ஸ்பான்ஸர் செய்ததால் இந்தப்படத்தை பார்க்கநேர்ந்தது.



எதிர்பாராத சில சமயங்களில் கொஞ்சம் நல்ல ட்ரீட் கிடைப்பதுண்டு. இதையும் அப்படிச்சொல்லலாம். ஒரு பிராமின் குடும்பத்து ஹீரோ பிராமின் என்று நினைத்துக்கொண்டு வெள்ளையாய் டீஸண்டாய் இருக்கும் ஹீரோயினை லவ் பண்ணிவிட அப்புறம்தான் தெரியவருகிறது, அவர் பக்கா லோக்கல் குப்பத்து ஆள் என்று. அண்ணன், அப்பா என்று செமை ரௌடீஸ். அவர்களைக் கெஞ்சி பிராமின் வேடமிட்டு இங்கு அழைத்துவருகிறார் ஹீரோ. ஃபுல் ஸ்விங்கில் காமெடியில் அடி பின்னியிருக்கலாம். சிக்ஸர் இல்லாவிட்டாலும் ஃபோர் அடித்திருக்கிறார்கள். முன் பாதி, ட்ராமா பாத்த எஃபெக்ட் வருகிறது, காமிராவுக்கு கதையில் ஸ்கோப் இல்லைனு நினைக்கிறேன். இரண்டாம் பாதியில் நன்றாக சிரிக்கமுடிகிறது. குறிப்பாகச் சொல்லவேண்டுமானால்.. ஹீரோவின் அப்பா, திருக்குறளை உயிராக மதிக்கிறார் என்பதால் அதை வைத்து அவரைக் கவிழ்க்க குறளைக் கையிலெடுக்கிறார்கள். இங்கு காமெடி என்ற பெயரில் குறளை அவமரியாதை செய்வார்களே என்ற பயம் எனக்கு. அப்படியெல்லாம் வாய்ப்பிருந்தும் இல்லாமல் நல்ல தரமான ஹார்ம்லெஸ் காமெடியைத் தந்திருக்கிறார் இயக்குனர். அதோடு ஒரு அழகிய குறள் பாடலும் தந்திருக்கிறார். கடைசியில் வரும் கிளைமாக்ஸ் ட்விஸ்டும் நன்றாக இருந்தது. குட் அட்டம்ட்.

*

பதிவர்களுக்கான ‘சவால் சிறுகதைப்போட்டி -2011’க்கு கதைகள் அனுப்பிவிட்டீர்களா.?

கதை எழுதுங்கள்.. ரூபாய் 3000 மதிப்புள்ள புத்தகங்களை வெல்லுங்கள்..

*

1 comment:

KSGOA said...

முரண் பார்க்க வேண்டிய படம் லிஸ்டில்
இருக்கிறது.