Saturday, February 14, 2015

காமச்சிறுபுனல்


அலையெழுப்பாது
அசங்காது
மெல்ல
நீரில் அமிழ்வதைப்போல
வேட்கை என்னை விழுங்குகிறது
நீர் தொடாத துளியிடமில்லை
அரக்கப்பறக்க துவட்டிவிடவோ
இதமாய் ஒற்றியெடுக்கவோ
நீதான் இல்லை
இப்போது என்னருகே!

*

ஒவ்வொரு தாழையும் 
தனித்துவமானது
போலவே
உன்னோடான ஒவ்வொரு நிகழ்வும் 
தனித்துவமானது
ஒப்பீட்டிலும் சரி
வாசனையிலும் சரி
நீயும் தாழையும் ஒன்றுதான்!

*

ஓரம் மடித்து
வரிகள் அமைத்து
அழகுற
கவிதைகள் எழுதுவதில்லை நீ
துளிவெண்மைக்கும் இடமின்றி
நெருக்கியடித்து
கிறுக்கித் தள்ளிவிடுகிறாய்
உவகையில்
தொடுதலென்பதன்
புது இலக்கணம் நீ!

*

தடக் தடக்கென
இதயம் துடிக்க
தாடைகள் நடுங்கி
வார்த்தைகள் சிதைய
நடுங்கும் கைகளோடு
உன்னை அழைத்தேன்
புதுப்புனல் போல
பிரவாகமாக
வந்தாய் நீ!

*

பின்கழுத்து
காதுமடல்
இதழ்கள்
என ஒரு ஓவியனைப்போல
நுணுக்கம் காட்டுகிறாய் ஒரு சமயம்
நிறங்களைக் கைகளால் 
அள்ளி அப்பிவிடும்
குழந்தையைப்போலவும்
இருக்கிறாய்
இன்னொரு சமயம்
கூடலில் 
உன் வழிகள் யாவுமே அற்புதம்!

*

பெருங்கடலின் 
சிறுதுளிதான் உன் படகு
ஆனால்
என்னை மீட்க வந்த தூது நீ!
உன் கொற்றத்தின் கீழ்
கடலும்
காற்துளியாகும்
நானும்
உன்னைச் சேர்வேன்!

*